甸恩胡積臣(右)獲得多間大球會垂青。(Getty Images)
般尼茅夫中堅甸恩胡積臣獲得多間大球會垂青，根據英國《獨立報》爆料，車路士已經出手斟介，向佢提供一份7年合約，呢位20歲西班牙國腳正在認真考慮今夏上「車」。
甸恩胡積臣現時合約附有5,000萬鎊(約5億港元)買斷條款，對於1位潛力新星而言，價錢唔算貴，皇馬、利物浦、阿仙奴、拜仁慕尼黑、車路士等豪門爭相搶購佢。雖然早前有傳甸恩胡積臣傾向加盟皇馬，但佢澄清只係有朋友建議佢轉投「銀河艦隊」，自己仲有5年合約在身，唔排除將來加盟大球會，畢竟任何球員都希望踢頂級賽事。
據悉車路士最有誠意，向甸恩胡積臣提出一份7年「肥約」，令佢開始心動。甸恩胡積臣出身於祖雲達斯青年軍，曾被外借去羅馬，上年7月以1,500萬鎊(約1.5億港元)轉投般尼茅夫，成為主力，今季上陣29場並有2球進帳，身價急升，祖記真係走寶。